باسيل يتّهم جعجع بالعمالة... "اسرائيل بتشغلك"!

اتهم رئيس التيار الوطني الحر النائب جبران باسيل، رئيس حزب القوات سمير جعجع بأنه “جزء من المشروع الإسرائيلي بلبنان”.

وقال، خلال احتفال انتخابي، “سمعتهم عم يردّدوا كتير انّو يلّي رح يصوّت للتيار بيكون عم يصوّت لحزب الله. شوفوا هالمزحة! وانا بالمقابل، بقلّكن: يلّي بيصوّت للقوات، عم يصوّت لإسرائيل ولحلفائها الاقليميين!”.

وأضاف، “سمير جعجع ما بطّل ولا يوم يكون جزء من المشروع الإسرائيلي بلبنان. إسرائيل يلّي احتلّت ارضنا ودمّرت بلدنا عدّة مرّات؛ اسرائيل يلّي لليوم عم تعرقل استخراجنا لنفطنا وغازنا. اسرائيل يلّي بتعتدي كل يوم علينا بالجو وبالبحر ويلّي تاركتلنا نصف مليون لاجئ فلسطيني على ارضنا”.

وتابع، “اسرائيل يلّي فوّتتنا بحروب أهلية وتركتنا بالجبل، وبشرق صيدا، وتركت الناس وراها بالجنوب وهربت. اسرائيل يلّي بتتقصّد تضرب لنا كل سنة موسمنا السياحي، وما بدّا لبنان لا يزدهر ولا يعمر”.

وأردف، “اسرائيل يلّي ولا مرّة ارادت الخير للبنان، وهدفها تضرب الاستقرار. ساعة بتشغّل جعجع بالمباشر، متل ايّام الحرب، وساعة بالواسطة، متل هالايّام، عبر حلفائها الاقليميين، يلّي هن بيعطوه المال وبيشغلّوه متل اي عميل عنده مشغّل بكل جهاز مخابرات اجنبي بيشتغل بالبلد”.

واعتبر أنه “يلّي بيصوّت للقوات، عم يصوّت لكل هول، وانتوا بتعرفوا مع هول لشو تعرّض الوجود المسيحي بلبنان وبالشرق ووين صار. بلبنان، من ايام دين براون وفكرة ترحيلنا بالبواخر لأيام فيلتمان، نحنا بعقلهم مشروع ترحيل جماعي دائم. وبالمنطقة، شوفوا حروب اسرائيل والغرب شو كانت نتيجتها على المسيحيين”.

قال، “نحنا بمرحلة مصيرية، عم نلعب لعبة وجودنا، منروح منسلّم حالنا ليلّي عم يهدّد وجودنا؟”.