كتبت الاعلامية رشا الزين مراسلة تلفزيون nbn بعد تغطيتها لمداهمة لاحد مستودعات الاغذية: رحنا اليوم ع مداهمة مع مدير عام وزارة الاقتصاد محمد ابو حيدر..ع مستودع للاغذية بالزلقا
المصيبة كانت مصايب…
لحم معفن متلج بينباع لحم مفروم…دجاج عظامه صارت مكاحل..بيرجع بيتنفخ او مدري شو بينعمل ليصير صدورة دجاج و كرسبي و ناغتس…مصارين فوارغ..معفنة بتنباع للمطاعم…فواكه مجففة للبوظة صارت تلج و تلوين…بتباع للمحلات لتصير بوظة غير شكل..
عدوا معي ملوخية كزبرة خضار مشكلة بازيلا….اكياس متلجة بتستخدمها كل ست بيت هالايام بالطبخ انو اوفر او اسرع او غير موسمها…
لك تفه تفه تفه….
بسترما معفنة…بيبيروني للبيتزا مصداية ازبط شي ينقال بوصفها…
جينا للمصيبة اللي كانت متمايزة
بضاعة مش خالصة مدتها لا…..انو مش حاطين ستكرز انو بعدها صالحة و هي ميتة ميت موتة..
لا …. التاريخ ببلش ب شهر ١٢ سنة ٢٠٢٠…و هون عم بحكي عن شوكولا ….للولاد الصغار بيندهن بالسندويش..مثلا…
تخيلوا…شوكولا خالصة مدتو من ٢٠١٩…بتنحط تواريخ مستقبلية…لينباع بالاسواق
هلق ما بقا نستغرب ليش في سرطان هلقد…ليش الاطفال عم تموت هلقد…ليش الامراض عم تزيد و تكتر..
لانو نحنا مستهدفين بامننا الغذائي..هون المعركة الاهم ضد الفساد…
هون النوايا بالمحاسبة و العقاب لازم تترجم بقاا
كل حيوان مسؤول عن هالجرائم المنظمة…ضدناااااا ضد صحتنا…لازم يتحاسب و بمحاكمة علنية..و الا…
ما بقا نحكي ب وطن..و لا ب مواطنة….
