كشف الإعلامي المصري محمود سعد عن عدم شعوره بالحب والاحترام تجاه والده الراحل، بعد تخلّي الأخير عن زوجته وأولاده طيلة حياته.
وقال سعد في فيديو نشره عبر صفحته في موقع “فيسبوك”: “يوم ما انتقل والدي إلى جوار الله، كنت بقول إني مش هزعل لأن بيني وبينه هجر وغدر، وجرح في قلب، بيني وبينه طريق وفراق وطريق هو اللي بدأه، والدتي فضلت 27 سنة تربّي في 4 عيال، مهتمتش ولا استمتعت بحياتها، أسرتها كانت عادية، لكن ربنا ساعدها”.
وأضاف: “لما والدي توفى كنت في مكتبي، والدتي بلغتني وطلبت مني أروح له بسرعة، وبالفعل سيبت الشغل ونزلت، والدي كان موصّي أخويا الكبير قبل ما يموت أنه يدّفن مع جدتي لأمي لأن كان بيحبها أوي، والدتي طلبت مني أنزّل نعي في الجورنال، قولت لها الناس متعرفش إني ليا أب أصلاً، لكن أمي أصرت على إننا نعمل عزاء”.
وتابع: “لما والدي توفى متأثرتش ولا كنت حاسس بحاجة، أنا حتى مش فاكر هو مات امتى، أبويا كان خالع نفسه من حياتنا رغم أنه كان غني، ورغم إن تربية أمي نجحت ومطلعتش مجرم ولا صايع، لكن لغاية دلوقتي لما اسمع حد بيتكلم عن أبوه بتضايق، ولما كبرت بقيت أقول أبويا قالي إيه أو إيه الذكرى اللي سابهالي ملقتش حاجة”.
واختتم محمود سعد الفيديو بالقول: “لكل أب مبيسألش على عياله، مراتك أنت وهي أحرار، لكن العيال هتكبر ومش هتنسى، هتفضل تيجي سيرتك بشكل مش كويس، وإنك تسأل على عيالك دي مش رحمة ولا مودة منك… دا واجب، إزاي تصب غضبك من مراتك على عيالك؟”.
Related Posts
