في مبادرة لإدارة جريدة ″سفير الشمال″ اللبنانية بالتعاون مع مكتبها في سيدني أستراليا تنشر قصيدة اليوم لأحد شعراء الإغتراب في أستراليا وأميركا والمهجر، وذلك للمساهمة في نشرها لقرأئها المنتشرين حول العالم..
سبعين..
دقِّت عِ بابي المسَا، وقالت: أنا السبعينْ،
حَبيت قبل الوقت اعملّك زيارهْ؛
بتقُول: شاعر انت، مش عم تعدّ سنينْ:
عَدّك العكسي ابتدى، والأرض دوّارهْ…
ممنُوع شرب العرَق والكيف والتلحينْ،
وممنُوع لَفّ الوجع ب شفاف سيكارهْ؛
وممنُوع ريح الغضَب، ممنُوع سَبّ الدّين،
وممنُوع تخلُط حكي الكنّه مع الجارهْ…
وممنُوع ترمي الودَع وتفسّر فْناجينْ،
وتحمل مسابِح خضر، وتقول: بصّارهْ؛
وممنُوع قصّ الهوا فساتين للحلوينْ،
وممنُوع رشّ الغزَل عَ درُوب “مزياره”!
وممنُوع تسأل بعد عن ناس وعْناوينْ،
وممنُوع فكّ الرصِد عَ باب المغارهْ؛
وممنُوع فَرق الشَّعر عا مُوضة العشرينْ،
وممنُوع تلبس صدَف العيُون اسوارهْ…
تطلّعت فيها وقلت: مين باعتِك تخمينْ؟
بَعدُو ب عزُّو النبع، والميّ فوّارهْ؛
ومليان بالي حكي وأنغام ودواوينْ،
والعمر سارح نهر، والشِّعر عبّارهْ….
وموعُود اقطُف حلم من نوم البساتينْ،
وأعصُر نجُوم السهَر، والليل خمّارهْ…
وحياة عينِك، اذا وصّلت للتسعينْ
ولو صار جسمي حطَب يابس، بيضلّ القَلب
عصفُور أحمر عَ شجرة جوز ختيارهْ!
