في مبادرة لإدارة جريدة ″سفير الشمال″ اللبنانية بالتعاون مع مكتبها في سيدني أستراليا تنشر يومياً قصيدة لأحد شعراء الإغتراب في أستراليا وأميركا والمهجر، وذلك للمساهمة في نشرها لقرأئها المنتشرين حول العالم..
مديح البحر
واسع متل بساط الصيفْ
بتساع، وما فينا نساعَكْ…
والشمس بتلمع عَ شراعَكْ
حمرا متل شفاف السيف.
انت الأغمقْ:
تحت الأزرقْ
شُو فيك كنوز وأسرارْ!
وبدّو يغرقْ
حتى تخلقْ
نجمه ب عيون البحّارْ.
سْواقي ونهوره وعيونْ
ودموع الغيم ب كانونْ
بيتلاقُو عَ مخدّة زندَكْ:
منَّك طلعُو،
ورجعُو ل عندَكْ!
وقلبَك موج وما بينامْ
الحُب سرير، الرحمه حْرامْ؛
ومرسال الّلي بعتُّو لْ عنّا
شكّل بالورد الايامْ…
انت الأصل وانت البيّ
وها السمكه، تحفة ديّاتَكْ،
تا تقدر تمشي عَ الميّ
اسقيها نقطه من ميّاتَكْ!
من شطّ العمر بناديكْ:
علّمني في قلبَك اسبَحْ،
ومتل الشمعه حدّ المدبَحْ
ضوّي ودُوب واخلص فيكْ!
