في مبادرة لإدارة جريدة ″سفير الشمال″ اللبنانية بالتعاون مع مكتبها في سيدني أستراليا تنشر يومياً قصيدة لأحد شعراء الإغتراب في أستراليا وأميركا والمهجر، وذلك للمساهمة في نشرها لقرأئها المنتشرين حول العالم..
زهر التلج
بينام ب سرير البردْ
والتلج فوقُو حْرامْ،
ولمّا الشمس
تفلش الضحكه عَ الجردْ
بتفيّق اللي نامْ…
بيطلّ راسُو
من شبابيك البكي
من تلج داب كتيرْ؛
وبتركض النحله،
لا شَور ولا حكي،
تا تبوّسُو وتطيرْ!
والحُب زهره لابسِهْ
تياب الصقيعْ،
تقلُّن: نسِي
يعود الربيعْ…
وبين الغصون اليابسِهْ
برعم وعي
أبيض بديعْ؛
ضوّى سراج المحبسِهْ
وعبّى الجرن
تا يشرب الطير الوديعْ!
وفي زهر مش متل الزهرْ
ما انقاسْ عمرُو بالشهرْ
ولا عاش عا ضفّة نهرْ…
يمكن شريطة نور
نزلِت عَ الدني،
يمكن من جنينة النعمه سوسنِهْ،
أو خيط من شال الطهرْ!
عطّر الكون ونامْ
عا مخدّة الآلامْ،
ومن بعد ما كفّى ال تلات ايامْ
طلّت شمس
رشّت ملبّس عَ الدهرْ..
ودحرج التلج وقامْ!
زهر التلجْ
عرس المرجْ
غنّية الرعيانْ..
بينام مش نعسانْ،
بيفيق مش سكرانْ…
جوعان
تا يشبّع نحل جوعانْ…
زهر التلجْ
عيد الوهجْ
والحُب والغفرانْ!
Related Posts
