قصيدة اليوم.. "جديدة السنة " شعر أنطوان القزي

قصيدة اليوم.. “جديدة السنة ” شعر أنطوان القزي

في مبادرة لإدارة جريدة ″سفير الشمال″ اللبنانية بالتعاون مع مكتبها في سيدني أستراليا تنشر يوميا قصيدة لأحد شعراء الاغتراب في أستراليا، وذلك للمساهمة في نشرها لقرأئها المنتشرين حول العالم..

جديدِه السنِه

جديدِه السنِه وبالعيد جِينالك
خللي يا ربّ بلادنا قبالك
حملنا الصلا بإيدين مرفوعين
رْكعنا عامدّ الكون كرمالك
جديدِه السنه والناس منتظرين
منّك عجيبه تبارك عيالك
مطرح بأرضي بلّش التكوين
خانوا المحبّه وقطّعوا حبالك
عسكر بيلاطس دنّس فلسطين
حرقوا الهدايا وكسّروا سلالك
ومطرح ما كنّا نعشق التزيين
صارت شموع العيد تتهالك
إنتَ اللي شمسَك شرْقت بصنّين
والبحر مَوجو رقّص خيالك
قللن يا الله ليش مختلفين
عطيوا لقيصر مالُن ومالَك
*****
وإنتَ يا شرق ل ناطر من سنين
معلّق صليب الكون عتلالك
بدم البرايا غِرقِت ميادين
ودفعتْ ضريبِه بدم أطفالك
وجنوب صابر عالأسى مْن سنينْ
نْ هجرِت طيورو شو بيبقالك؟

حَلّو قدَرنا يقتل التنّين
وحلاّ المحبّه تزيِّن جبالك
خلف البحر ل ولاد مشتاقين
وشاعرْ غريب بيحصد غلالك
قاعدْ لحالي أنظم دواوين
وحال القصيدِه صار من حالَك