بعد مرور شهرين على كارثة انفجار مرفأ بيروت، كتب خطيب الشهيدة سحر فارس، جيلبير قرعان على حسابه الخاص على تطبيق انستغرام كلمات مؤثرة استذكر فيها الشهيدة البطلة.
وكتب جيلبير: عروستي الحلوة البطلة ملاكي الحارس شهرين صارو يا سحّورة ، شهرين وانتي عنّي بعيدي ، شهرين وانا بسأل وينك يا عروس ،وينك يا فرحة البيت وضحكة البيت ، وينك طولتي الغيبة الحجار اشتاقولك يا عيوني ، اتدمرت حياتنا عغيابك عنّا ، صرنا نمثّل على بعضنا مين اقوى من التاني انا واهلك واخواتك وصهرك واهلي ونحنا مننطر ثانية وحدنا حتى نفش خلقنا،صورك على كل زاوي من البيت ، عم بحكيكي كل ثانية وكل دقيقة وخبرك كلشي واشكيلك وجعي وقلك سامحيني اذا مخنوق لان قد ما احكي ما حدا بيفهمني قدك وبيعرف شوفي بقلبي ، بس روح من البيت بقلك مشيت وبس ارجع بقلك وصلت انا يا قلبي ،بس مافي حدا يستقبلني عالباب ويغمرني ويقلي شتقتلك يا ضنا ، وعم باكل وحدي وكلشي عم بعملو وحدي ، بتعرفي يا سحّورة كتير عم بسأل ربنا ليش دوقني هالكاس المر والكف القوي ،ليش اخد مني كلشي بلحظة ،ليش اخدك مني وهو عارف انك انتي كلشي بملكو ،هو عارف انك خطيبتي وحا تصيري مرتي بعد كم شهر، هو عارف انك رفيقتي واختي وامي،هو عارف انو يلي كنت قلك ياه وفشلك خلقي في مكنت قولو لامي واختي ،ليش اخد مني كلشي مبعرف ،بس بعرف انو الله بياخد اجمل وردات وزهور لا بستنانو بالسما ،وانك علمتيني ما اترك المسبحة من ايدي وانو هون مش الحياة ،الحياة فوق حد الله والعدرا ويسوع ،الحياة بلا طعمة وما الا معنى بقى بعد ما انتقلتي لحضن العدرا ويسوع ، عم صلّي يكون اللقاء قريب كتير ،انت معي بكل خطوة وعم بستشيرك بكل شي ،الفرق انك معم تردّي عليي واسمع صوتك الحلو غير بالفيديو .
وتابع: انت ما تركتيني ،وانت ما كان بدك تفلّي لانك بتحبي الحياة والفرحة مش سايعتك ،انت انقتلتي ببلدك يلي كنتي عم تحمي املاكو ،ما تزعلي يا قلبي لان حقك وحق رفقاتك الابطال برقبتي ورقبت كل بيت لبناني حبّك، وعدي الك وقدام الله انو ما وقّف الا ما جبلك حقك بالحلال او بالحرام .
واضاف: كوني معي كل دقيقة انا بحاجتك كتير ما تتركيني من فوق اعطيني القوة حتى كفي مشوارك وجبلك حقك وحق رفقاتك يلي اهلن واخواتن نشفوا دموعن ،ومتا ما انت ورفقاتك الابطال صرتوا عيلي وحدة فوق نحنا عالارض صرنا عيلة وحدة نحن واهلن ،خلّو عينكن علينا ما تتركونا وصلولنا وصلو لكل بيت صرتوا جوّاتو
الله والعدرا وانت بيعرفوا قديش اشتقتلك بحبك وعم حبك كل يوم اكتر ورح ضل حبك حتى نجتمع ونكفي مشوار احلامنا يا روحي انت الهوا يلي بتنفسوا سحّورة قلبي
