في مبادرة لإدارة جريدة ″سفير الشمال″ اللبنانية بالتعاون مع مكتبها في سيدني أوستراليا تنشر يومياً قصيدة لأحد شعراء الإغتراب في أوستراليا، وذلك للمساهمة في نشرها لقرأئها المنتشرين حول العالم
خايف
خايف وناطر حد باب البيت
ومنك لحالك ناطر تفيقي
وخايف شي لهتي تنّقز السكيت
وتوعي عاضجة بلعتي بريقي
وخايف شي حلم يغطّ عالرمشين
ويرعى الوهج من لون خديكي
ويمرق ما يتحفّى عاببو العين
ويجرّح الغفوة ال بِعينيكي
وخايف لا تختك عالهدا ينهّز
وبجسمك تدوخ النعومية
ويستغنم الفرصة حرير القز
اللي بشرشفك ويشلّحك هيي
وخايف لا نومك حد صبري يطول
ويصير طيفي بحلمك غباشي
وتغفي وتنسي هالزمن مشلول
والوقت متل الزلحفة ماشي
لا لا غرقي بنومك يا أحلا مْلاك
وعامخدتك نوم الهنا نامي
تاطرّز حرامك من الأفلاك
واسحبّلك سريرك من عضامي
وضلّي غرفي من النوم راحة بال
وانطر أنا وتفقّع ضلوعي
وحتى ما يهدر شعرك الشلال
سحرتو تا وحدك عالهدا توعي
وهلأ أنا تا ريّح عيوني
وإختم ببيتك كل الحكاية
رح لِفّ نور الشمس بظنوني
وإعملّك من الليل بردايي
Related Posts
